2 Raja-raja 22

Iatu Yosia karuamo taunna tonna dadi datu, anna ma’parenta tallungpulo mmisa taunna dio Yerusalem. Iatu indo’na disanga Yedida, anakna Adaya dio mai Bozkat.

Napogau’mi tu apa malolo dio pentiroNa PUANG sia unturu’ bate lalanna Daud, nene’ to dolona sia tae’ nasepang lako kanan ba’tu lako kairi.

Iatonna ma’pessangpulo karuamo taunna ma’parenta tu datu Yosia, nasuami datu tu Safan, pangulu to massura’, anakna Azalya, anakna Mesulam, lako banuanNa PUANG, nakua:

Maleko lako tominaa kapua Hilkia, suai umbilangi tu mintu’ doi’, tu dipatama banuanNa PUANG, tu naduruk mintu’ to ma’kampa babangan dio mai to buda.

Anna disorong tu doi’ iato lako kapala diangka’ la ungkapalai pa’diaman dio banuanNa PUANG, kumua nabenni mintu’ to mengkarang, iamotu mintu’ to mengkarang lan banuanNa PUANG la umpemeloi tu mintu’ sanggangna lan banua iato:

iamotu lako mintu’ to mengkarang sia mintu’ to manarang umbangun banua sia mintu’ pande batu, sia la dipangallian kayu sia batu dipa’, la umpemeloi tu banua iato.

Apa iatu doi’ disorongan tau iato mai tae’mo nadireken, belanna dikatappa’imo.

Ma’kadami tu tominaa kapua Hilkia lako Safan, pangulu to massura’ nakua: Kuappa’mo tu sura’ Sukaran aluk lan banuanNa PUANG. Nabenmi Hilkia tu sura’ iato lako Safan, anna basai.

Saemi tu Safan, pangulu to massura’, umpennoloi datu, napokadai lako datu tu mintu’ apa mangka napogau’, nakua: Nabolloammo taummi tu mintu’ doi’ lan mai patti, tu lan banua kabusungan, anna sorongi lako to ungkapalai pa’diaman dio banuanNa PUANG.

Sia naparampo duka Safan pangulu to massura’, lako datu nakua: Nabenna’ to minaa Hilkia misa’ sura’. Nabasami Safan dio olona datu.

Iatonna rangimi datu tu mintu’ kada lan mai sura’ Sukaran aluk, naserek-serekmi tu tamangkalena.

Mepasanmi tu datu lako to minaa Hilkia sola Ahikam, anakna Safan, sia lako Akhbor, anakna Mikhaya, sola Safan, pangulu to massura’, sia lako Asaya, to mase’ponna datu, nakua:

Malekomi umpekutanangki’ timbanganNa PUANG, iamotu aku sia to buda sia mintu’ to Yehuda diona mintu’ kada lan te sura’ iate, tu diapparammo, belanna mandu tu kare’dekanna ara’Na PUANG, tu ma’lulu-lulu lako kita, belanna tae’ naperangii nene’ to dolota tu mintu’ kada lan sura’ iate sia tae’ naturu’i tu mintu’ apa Nasurasangki’.

Malemi tu to minaa Hilkia sia Ahikam sia Akhbor sia Safan sia Asaya lako Hulda, nabi baine, bainena Salum, to ma’kampa pakean, anakna Tikwa, anakna Harhas. Iatu Hulda torro dio Yerusalem lan kampong ba’ru. Anna sipa’kada-kada tau iato mai tu baine iato.

Ma’kadami lako tau iato mai nakua: Inde sia tu kadanNa PUANG, Kapenombanna to Israel, Nakua: Pokadanni tu tau ussuakomi sae umpellambi’iNa’, kumua:

Inde sia tu kadanNa PUANG, Nakua: Manassa la Kuparampoi kamandasan te inan iate sia mintu’ to torro lan, iamotu mintu’ apa lan sura’ tu mangka nabasa datu to Yehuda,

belanna naboko’iMo’ tau iato mai sia untunumo pemala’ lako kapenomban senga’, la umpa’dikki penaangKu napobua’ mintu’ panggaraga limanna. Bannang iamoto anna ma’lulu-lulu tu kare’dekan ara’Ku lako inan iate sia tang la dipa’deimo.

Apa lako datu to Yehuda, tu ussuakomi umpekutanan timbanganNa PUANG, la mikuan susite: Inde sia tu kadanNa PUANG, Kapenombanna to Israel: Iatu diona mintu’ kada mangka murangis-

belanna malamma’ tu penaammu sia umpamadiongangko kalemu dio oloNa PUANG, tommu mangka urrangii tu apa mangka Kupokada diona te inan iate sia iatu to torro lan, kumua la metakuran sia tampakan ropu, sia belanna usserek-serekko tamangkalemu sia tumangi’ dio oloKu, iamoto Kuperangii dukako, kadanNa PUANG.

Manassa la Kupasisolako nene’ to dolomu; la dipatama marampa’ko liangmu, sia tae’ nala untiro lenni matammu tu kasanggangan tu la Kuparampo lako inan iate. Naparampomi tau iato mai lako datu te pebali iate.